EA est, quam pridem, cum adhuc in hac celeberrima Salmanticensium academia auditorem in iure Pontificio agerem , de doctissimo doctore Martino ab Azpilcueta Nauarro, deque illius moribus & eruditione concepimus , opinio. Ea iam inde ab eo tempore inter nos arctissima contracta in Christo amicitia, vt quod ipse fertur suae foelicitati ascribere, nempe quod eius opera per nos probarentur, id meae non paruae deputem. Ea Manualis Confessorum poenitentiumque iam pridem ab eodem editi, non semel a me lecti ac perlecti, quam sua succi plena breuitate profert, vtilitas id, quod nunc summo recessu, cura & studio, quorum nos testes oculati sumus, auxit. ornauit muniuitque actorium, vt quam libentissimo animo, qua fungimur authoritate Illustrissimi Reuerendissimique domini Francisci Manrrici Salmanticensis Episcopi dignissimi, cuius proepiscopum agimus, ei facultatem faciamus, quamque praesentibus facimus imprimendi illud, impressumque quoties volet edendi longe amplissimam, quo dignissimum duximus opus, ex quo tantum fructus totius Hispaniae orbis excerpsit excerpetque . Quin, & quo adeo emunctum opus semper pure nitideque excudatur, quam latissime possumus sub poena excommunicationis latae sententiae, quam in his scriptis trina, eademque canonica monitione praemissa ferimus, inhibemus omnibus, nequis sine praefati doctoris permissu praedictum Manuale excudat, aut excusum vendat. Datum Salmanticae. 17. Iunii. 1556.