LIBRVM de Asiatico Lusitanorum Imperio, a Patre Seraphino de Freitas Lusitano, sacri ordinis Mercenariorum in celeberrima Vallesoletana Academia, in sacris Canonibus Doctore, vespertinaeque Cathedrae peritissimo moderatore, mira eruditione compositum, de mandato Regij Senatus, qua potui diligentia legi, maximaque delectatione relegi; nihilque in eo non laudabile, nihilque non laude dignum reperi, siue enim singularem vtriusque iuris peritiam, siue candidam sermonis puritatem, siué in expugnandis aduersariorum fundamentis solers artificium, siue historiarum cognitionem, siue Cosmographiae, ac Geographiae notitiam spectemus. Libenter fatebimur, eum non vt hospitem, sed vt ciuem, in omnibus his professionibus se ostendisse. Opus plane dignum, quod ad totius orbis vtilitatem, acuratissimis excudatur caracteribus. Matriti calendis Octobris. Anno Domini millesimo sexcentesimo vigesimo quarto.