LIBRVM de Aſiatico Luſitanorum Imperio, à Patre Seraphino de Freitas Luſitano, ſacri ordinis Mercenariorũ in celeberrima Valleſoletana Academia, in ſacris Canonibus Doctore, veſpertinæque Cathedræ peritiſsimo moderatore, mira eruditione compoſitum, de mãdato Regij Senatus, qua potui diligentia legi, maximaque delectatione relegi; nihilque in eo non laudabile, nihilque non laude dignum reperi, ſiuè enim ſingularẽ vtriuſque iuris peritiam, ſiuè cãdidam ſermonis puritatem, ſiué in expugnandis aduerſariorum fundamentis ſolers artificium, ſiuè hiſtoriarum cognitionẽ, ſiuè Coſmographiæ, ac Geographiæ notitiã ſpectemus. Libenter fatebimur, eum non vt hoſpitem, ſed vt ciuem, in omnibus his profeſsionibus ſe oſtẽdiſſe. Opus planè dignum, quod ad totius orbis vtilitatem, acuratiſsimis excudatur caracteribus. Matriti calendis Octobris. Anno Domini milleſimo ſexcenteſimo vigeſimo quarto.