Qua ratione D. Bernard. lib. 1. de considerat. ad Eugenium [sect. 16] etiam Summum Pontificem notat, ubi se civilibus & saecularibus negotijs immiscet, & temporalium Principum iurisdictionem assumit: In criminibus, inquiens, non in possessionibus potestas vestra: propter illa siquidem, & non propter has, claves accepistis Regni coelorum, praevaricatores exclusuri, non possessores. Habent haec infima, & terrena iudices suos, Reges & Principes terrae. Quid fines alienos invaditis? Quid falcem vestram in alienam messem extenditis? Et lib. 2. Vicario Christi non dominatus in orbem, sed Apostolatus convenit. Nam Principes gentium dominantur eorum, at non ita inter vos. Et praesensit [sect. 17] D. Paul. ad Roma. 14. dum ait: Tu quis es, qui; iudicas alienum servum? Domino suo stat, aut cadit: quo in loco D. Hieronymus paraphrastice inquit: Cuius tu auctoritatis es, ut iudices eum, quem lex non iudicat? [sect. 18] Sic aperte insinuantes, nullam potestatem, quantumvis Regiam, aut Pontificiam, infidelibus sibi non subditis, & invitis, leges, & praecepta morum dare posse, & longe minus ad eorum punitionem procedere, vel ob hanc causam adversus illos bellum inferre.