Quâ ratione D. Bernard. lib. 1. de conſiderat. ad Eugenium † etiã Summum Pontificem notat, ubi ſe civilibus & ſæcularibus negotijs immiſcet, & temporalium Principum iuriſdictionem aſſumit: In criminibus, inquiens, non in poſſeſsionibus poteſtas veſtra: propter illa ſiquidem, & non propter has, claves accepiſtis Regni cœlorum, prævaricatores excluſuri, non poſſeſſores. Habent hæc infima, & terrena iudices ſuos, Reges & Principes terræ. Quid fines alienos invaditis? Quid falcem veſtram in alienam meſſem extenditis? Et lib. 2. Vicario Chriſti non dominatus in orbem, ſed Apoſtolatus convenit. Nam Principes gentiũ dominantur eorum, at non ita inter vos. Et præſenſit † D. Paul. ad Roma. 14. dum ait: Tu quis es, qui; iudicas alienum ſervum? Domino ſuo ſtat, aut cadit: quo in loco D. Hieronymus paraphraſticè inquit: Cuius tu auctoritatis es, ut iudices eum, quem lex non iudicat? † Sic apertè inſinuantes, nullam poteſtatẽ, quantumvis Regiam, aut Pontificiam, infidelibus ſibi non ſubditis, & invitis, leges, & præcepta morum dare poſſe, & longè minus ad eorum punitionem procedere, vel ob hanc cauſam adverſus illos bellum inferre.