Quam opinionem si quis defendere velit, ad argumenta, quae pro contraria retulimus, respondere poterit. Non obstare primum [sect. 46] ex tyrannidis vitio desumptum, quo Indorum Reges, ut plurimum, uti probavimus. Nam omissa solutione Episcopi Chiapensis in Apolog. contra Sepulved. fol. 15. & sequentib. & in respons. ad obiect. eiusd. replicat. n. fol. 45. qui respondet, hanc causam sufficientem non esse; cum Indi sub illorum imperium pacifice viverent, & Hispanorum opem non implorarent, de qua egimus sup. cap. praecedenti n. 89. & seq. perpendi etiam potest, duos [sect. 47] Principes, quorum unus sit fidelis, & alter infidelis, eo modo se habere inter se se, quo duo homines privati, ut considerat Aragon d. 2. 2. q. 10. art. 8. pag. 291. & Acosta d. lib. 2. cap. 4. pag. 221.