Et praeterea, nunquam[sect. 114] populum Israel, auctoritate propria, Chananaeorum, Amorrhaeorum, & aliorum Gentium provincias occupasse, ob id tantum, quod infideles, aut idololatrae essent, vel alijs criminibus contra naturam operam darent; sed propter specialem, & expressam Dei sussionem, & donationem, qui eis illas terras ad habitandum promiserat: vel quia eis transitum impediebant, aut aliter infensi erant: vel quia ut ait D. August. lib. 6. quaest. q. 10. in Iosue, & lib. 44. quaest. 4. sup. Numer. cap. 20. serm. 105. de tempore, tom. 10. & Cassian. collat. 5. cap. 24. Sem filius Noe illarum dominus fuerat, & postea, per vim & arma, Chananaei, filij Cham, eas sibi usurparunt: unde cum filij Abrahae a Sem originem ducerent, illas repetendi & vindicandi, ius praetendere potuerunt.