Et [sect. 83] Petrus Blesiensis luculentissimus sui temporis Scriptor, relatus & laudatus ab Illustriss. Cardin. Baronio in Paraenesi ad Remp. Venet. pag. 6. qui Coelestinum Pontificem his verbis alloquitur: Princeps Apostolorum adhuc in Apostolica sede regnat, & imperat, & in medio est constitutus iudiciarius rigor: illudque restat, ut exeratis in maleficos, Pater, gladium Petri, quem ad hoc constituit super gentes & Regnae, Christi crux antecellit Caesaris aquilas, gladius Petri gladio Constantini, & Apostolica sedes praeiudicat Imperatoriae potestati. Vestra potestas a Deo est, an ab hominibus? Nonne Deus Deorum locutus est vobis in Petro Apostolo, dicens: Quodcunque ligaveris super terram, erit ligatum & in coelis: & quodcunque solveris super terram, erit solutum & in coelis? &c.