Hoc idem [sect. 20] non minus aperte post Sanderum, & Boterum, quos refert, scriptum reliquit Rutilius Benzonius de anno Iubilaei lib. 1. cap. 10. pag. 53. sic inquiens: Hanc Novi Orbis conversionem inprimis complexus est Alexander VI. qui, ut cognovit illius notitiam in dies excrescere, & Hispaniarum Reges eo animo esse, ut non minus temporale ipsorum Regnum, quam, imo praecipue Regnum Dei amplificarent, hoc illis demandavit, eosque adstrinxit, ut maxima, qua possent, diligentia, in illorum populorum conversionem incumberent, quod ut fortius exequerentur, ipsis, quidquid acquirerent, omni meliori modo concessit, &c.