Regnum [sect. 84] vero Portugalliae, sive Lusitaniae Romanae Ecclesiae feudum agnoscere absque aliqua haesitatione affirmat idem Marta dict. cap. 26. ex num. 95. argument. text. in cap. grandi de supplen. neglig. Praelat. Paramus de origine, & progress. Inquisit. lib. 3. quaest. 1. opin. 3. num. 113. & apertius probat Rodericus Archiep. Toletan. de reb. Hisp. lib. 7. cap. 7. ubi de Alphonso Henricio eiusdem provinciae Comite loquens, ait: Hic primus in Portugallia sibi imposuit nomen Regis, & ab Eugenio III. cui nomen suum constituit censuale, multa privilegia, & indulgentias impetravit. Idem etiam memorat Genebrard. in sua Chronogr. citans Garibaium part. 4. lib. 34. cap. 16. nisi quod pro Eugenio Alexandri nomen reposuit, inquiens: Alexander III Alphonsum Portugallensium novo, & primo Regi coronam per Albertum Cardinalem tradit, ea lege, ut quotannis Portugallenses Reges duas auri libras Ecclesiae Romanae persolverent.