Nec Enim potest quis gladij potestatem sibi datam, vel alterius coertionis ad alium transferre. Ego indistincte accipio, quomodocunque potestas data sit, hoc est, siue generaliter, siue specialiter, siue lege, seu qua alia iuris parte. Sed etsi commissi magistratus autoritate ac iure, seu principis delegatione generali, vel speciali competat, idem dicendum puto. Ac nec si proficiscatur quidem, Proconsul, aut Praeses, licere eis exercitationem iuris gladij mandare arbitror, quamuis legis Iuliae exercitatio a proficiscente mandari possit. Nam poena illius legis non est gladij animaduersio, vt plenius mox dicemus, in l. j. de of. eius.