Vos o praecipue nemorum gaudete coloni,
[sect. 27] Vos populi gaudete mei, licet omne vagetur

 Securo custode pecus, nocturnaque pastor

 Claudere fraxinea nolit praesepia crate.

 Non tamen insidias praedator ouilibus vllas

 Adferet, aut laxis abiget iumenta capistris,

 Aurea secura cum pace renascitur aetas,
   Et redit ad terras tandem squalore, situque

 Alma Themis posito, iuuenemque beata sequuntur

 Secula, maternis causam qui lusit in vlnis.

 Dum populos Deus ipse reget, dabit impia victas

 Post tergum Bellona manus, spoliataque telis,

 In sua vesanos torquebit viscera morsus.

 Et modo quae toto ciuilia distulit orbe

 Secum bella geret: nullos iam Roma Philippos

 Deflebit, nullos ducet captiua triumphos:

 Omnia tartareo subigentur carcere bella,

 Immergentque caput tenebris, lucemque timebunt.

 Candida pax aderit, nec solum candida vultu

 Qualis saepe fuit, quae libera marte professo,

 Quae domito procul hoste, tamen grassantibus armis,

 Publica diffudit tacito discordia ferro:

 Omne procul vitium simulatae cedere pacis

 Iussit, & insanos dementia condidit enseis.

 Nulla catenati feralis pompa senatus

 Carnificum lassabit opus, nec carcere pleno

 Infelix raros numerabit curia patres.

 Plena quies aderit, quae stricti nescia ferri,

 Altera Saturni reuocet Latialia regna,

 Altera regna Numae, qui primus ouantia cede

 Agmina Romuleis, & adhuc ardentia castris

 Pacis opus docuit, iussitque silentibus armis

 Inter sacra tubas, non inter bella sonare.

 Nec iam adumbrati faciem mercatus honoris,

 Nec vacuos tacitus fasces, & inane tribunal

 Accipiet consul: sed legibus omne reductis

 Ius aderit, moremque fori, voltumque priorem

 Reddet, & affictum melior Deus auferet aeuum,

 Exultet, quaecunque Notum gens ima iacentem,

 Erectumque colit Boream, quaecunque vel Ortu,

 Vel patet Occasu, medioúe sub aethere seruit.