Fatis agimur, credite fatis.

 Non solicitae possunt curae

 Mutare rati stamina fusi.

 Quidquid patimur mortale genus,

 Quidquid facimus, venit ex alto.

 Seruatque sua decreta colus.

 Lachesis dura reuoluta manu

 Omnia secto tramite vadunt,

 Primusque dies dedit extremum.

 Non illa Deo vertisse licet,

 Quae nexa suis currunt causis.

 It cuique ratus prece non ulla

 Mobilis ordo: multis ipsum

 Timuisse nocet: multi ad fatum

 Venere suum, dum fata timent.