ROmeros, e pelegrinos ſson omes que fazen ſsus romerias e pelegri najes, por ſseruir a Dios e hõrrar los ſsantos, e por ſsabor de fazer eſsto, eſstrañan ſse de ſsus logares, e de ſsus mugeres, e de ſsus caſsas, e de todo lo que han, e van por tierras ajenas, lazerando los cuerpos, e deſspẽdiendo los aueres, buſscando los ſsantos. Onde los omes que con tã buena intencion, e a tan ſsanta, andan por el mundo, derecho es, que mientra en eſsto andouieren, q̃ ellos e ſsus coſsas ſsean guardados, de manera, que ninguno non ſse atreua de yr contra ellos, faziendo les mal. E porende pues que en el ti tulo ante deſste fablamos delos ayunos e de las fieſstas de los ſsantos, e de las limoſsnas, como ſse deuẽ fazer, queremos aqui dezir de los pelegrinos, e de los romeros que los van viſsitar, e honrrar. E moſstrar primeramente, que quiere dezir Romero, o pelegrino. E quantas maneras ſson dellos. E en que forma deuen ſser fechas las romerias. E co mo deuen ſser honrrados e guardados por los logares por donde andouieren e llegaren. E que priuillejos han, andãdo en eſsto, mas que los otros omes. E como pueden fazer ſsus mandas e. E q̃ debdo naſsce entre ellos, yendo en vno en romeria. E que pena mereſscen los que les fizieren fuerça, o tuerto, o de mas: mientra en las romerias, o en los pelegrinajes andouieren.

ROmero tanto quiere dezir como ome que ſse aparta de ſsu tierra, e va a Roma f, para viſsitar los ſsantos logares en que yazen los cuerpos de ſsant Pedro e ſsant Pablo, e de los otros ſsantos, que tomaron martyrio por nueſstro ſseñor Ieſsu Chriſsto. E pelegrino g tanto quiere dezir, como ome eſstraño, que va a viſsitar el ſsepulcro ſsanto de Hieruſsalem, e los otros ſsantos lo gares, en que nueſstro ſseñor Ieſsu Chriſsto naſscio, biuio, e tomo muerte e paſsſsion por los pecadores: o que andan en pelegrinaje a Santiago, o a ſsant Saluador de Ouiedo, o a otros logares de luẽga e de eſstraña tierra. E como quier que departimiento es, quanto en la pa labra entre romero e pelegrino: pero ſse gund comunalmẽte las gentes lo vſsan aſssi llaman al vno como al otro. E las maneras de los Romeros e los pelegrinos ſson tres. La primera es, quando de ſsu propria voluntad, e ſsin premia ninguna, van en pelegrinaje a alguno deſstos ſsantos logares. La ſsegunda, quãdo lo faze por voto por promiſssion q̃ fizo a Dios. La tercera es, quando alguno es tenudo delo fazer por penitẽcia h que le dieron que ha de cumplir.