*Et vt circa negotium istud aliquid pro
feramus, mirari iuuat quomodo Regium Indiarum Consilium, cùm tanti illud momenti fuerit,
non iudicauerit opportunum, immò & necessarium, Prouinciarum Indicarum sensum prænouisse. Licet enim contractus fuerit visus conueniens, & earum caussa vtiliter peragi, prudentium tamen, & eximiè prudentium fuit, quales
illo fouentur in gremio, id quod accidit, posse
accidere præuidere; quod quidem Prouinciarum
sensu cognito anteuerti potuit, numquàm post
quæstuosam enormiter experientiam reparandum. Notissima regula est,
Quod omnes tangit,
debet ab omnibus approbari. 29. in 6. Scio plures
illam exceptiones pati, sed nescio an in casu nostro aliqua ex illis possit habere locum. Consilium
quidem in arena sumere aliquando necessitas ipsa
compellit; sed quando illa non talis, nullis prudentiæ regulis poterit adaptari; & perinde est
cum Consilio insciorum in re, de qua agitur, fecisse, ac nullum adhibuisse consilium
: estque
hoc ingens, quod Indiæ patiuntur incommodum,
à remotissimis gubernatæ. Ante annos aliquot
classis Indicæ reditus occasione hostilium incursionum vltra expectationis terminos insolitè retardatus. Habuit id nimiùm & Regem, & Curiam, & quotquot agnouere, solicitos. Indicitur
à Rege consultatio, vt & circa caussas inquirant,
& de remedio peruideant viginti primarij viri, in
quibus erat Excellentissimus Manceræ Marchio
Prorex paulò ante Peruuianus, cuius vidi epistolam Religioso amico scriptam, in qua id se pro
certo asseruisse dicebat; moræ caussam minimè
motui alicui Peruuianorum incolarum adscribendam
(nam & erant tale aliquid suspicantes
)
eo quòd eorum haberet fidelitatem vsquequaque
perspectam. Dolebatque solum se in ea consultatione inuentum, qui rei, de qua agebatur, aliquam
experientiam haberet, reliquis profunda ignorantia laborantibus rerum Indicarum. Cùm ergo
in Curia experientia desit, & necessarium sit pro
Consiliarijs ipsis consilium, Viris alioqui magnis,
inde petendum, vnde venire potest, & potest solùm ab ijs, qui res habent præ oculis, & commoda ac incommoda possunt bono cum zelo fideliter recensere.